Rajoni

Një pjesë e qytetarëve të Serbisë votuan si ne zgjedhje një marrëveshje simbolike me opozitën për të mos përsëritur më sistemet totalitare. Premtimi i opozitës është se qytetarët do ta udhëheqin shtetin dhe më nuk do të ketë nevojë për protesta. Por, para se kjo të ndodh qeverisja e presidentit, Alleksandar Vuçiq, duhet të largohet. Protestën e kanë mbështetur disa figura serbe.

“Duhet të gjejmë njerëz që do ta shërbejnë popullin dhe jo ta udhehqin atë dhe duhet marrë masa për shpërndarjen e fuqisë, e jo kjo të jetë vetëm e nje njeriu dhe e një partie.” –deklaron Srgjan Shkoro, Gazetar

“Solidariteti me njerëzit e rrezikuar dhe të mposhtur po e zgjon Serbinë. Zgjedhjet kriminale i fitojnë kriminelët dhe kërkojmë liri të medias të paktën gjashtë muaj për të shkuar në zgjedhje.” – shprehet Bozho Prellevic, Avokat.

Protestuesit në kryqytetin serb kanë tre muaj që protestojnë kundër kontrollit të mediave dhe pushtetit, siç thonë, absolut të vetëm një njeriu. Kësaj radhe protestat janë shtrirë edhe në disa qytete duke e bërë një të tretën e qyteteve ku protestohet.
Ata kanë vazhduar drejt presidencës dhe më pas para kuvendit serb për të treguar se institucionet u takojnë atyre. Kjo, thonë ata, është hera e fundit kur Serbia do të ketë nevojë për protesta kundër një regjimi. /Idro Seferi, Beograd/

Ekipi negociator i Kosovës ka dorëzuar të premten platformën për dialogun me Serbinë, që ndërmjetësohet nga Bashkimi Evropian, në një takim me kryetarin e Kuvendit të Kosovës, Kadri Veseli. Kjo platformë pritet të procedohet edhe në Kuvendin e Kosovës për miratim.

Kryetari i Kuvendit të Kosovës, Kadri Veseli, ka thënë pas takimit se platforma thekson qartë se Kosova nga dialogu do të dalë me njohje dhe do të garantojë ulëse në Kombet e Bashkuara dhe integrim në organizatat ndërkombëtare.

Bashkëkryesuesi i Ekipit negociator Shpend Ahmeti, ka thënë se platforma përbëhet nga 11 parime, të cilat përcaktojnë qartë qëndrimin e Republikës së Kosovës, ku përfshihet integriteti territorial dhe ka për rezultat njohjen e Kosovës nga ana e Serbisë.

Ndërkaq, bashkëkryesuesi tjetër i Ekipit Negociator, Fatmir Limaj, ka bërë thirrje për unitet shtetëror dhe miratim të kësaj platforme nga ana e Kuvendit të Kosovës.

Dy partitë më të mëdha opozitare kanë refuzuar të përfshihen në hartimin e platformës për dialogun me Serbinë derisa Shtetet e Bashkuara dhe Bashkimi Evropian kanë bërë të qartë se vazhdimi i dialogut ndërlidhet me pezullimin e tarifës doganore që u është vendosur importeve nga Serbia dhe Bosnjë Hercegovina. /REL/

Beogradi zyrtar i ka varur shpresat tek presioni i Shteteve të Bashkuara që Kosova të heqë taksën për produktet serbe. Ndërkohë, analistët serbë vlerësojnë se bisedimet e ndërmjetësuara nga Brukseli nuk kanë shkuar në drejtimin e duhur.

Serbia është në pritje të efektit të porosive nga SHBA për Kosovën. Krerët e shtetit serb janë shprehur të gatshëm të vazhdojnë bisedimet nëse hiqet taksa. Por, pyetjet se në çfarë forme dhe për çfarë do të ketë bisedime ngelin të hapura. Presidenti serb në njërën anë po përballet me protesta kundër tij dhe ka nisur një kundër fushatë të vizitave në tërë Serbinë.

Marko Savkovic, ekspert për rajonin, thotë se vetëm SHBA tani kanë një ide që duhet të arrihet marrëveshja. Dështimi i dialogut shkon edhe në adresë të BE-së.

“Është një paqartësi e madhe për shkak se akterët kryesorë përballen me probleem të brendshme, pastaj flitet për zgjedhje këtu në Serbi edhe në Kosovë dhe nuk shoh gatishmëri. Nëse nuk arrihet një zgjidhje këtë vit për palën serbe do të humbet rasti për një gjeneratë të tërë.” tha Marko Savkoviq, Qendra për Politika të Veçanta, Beograd

Kosova dhe Serbia kanë kaluar në faza të ndryshme. Por, normalizimi nuk ka ndodhur. Bisedimet teknike fillimisht sollën shpresë dhe më pas evoluan. Incidente të shumta dhe pak tolerim. Në fund idetë për kufijtë, interpoli dhe taksa. Stefan Surlic, i lindur në Prishtinë, pedagog tek Fakulteti i Shkencave Politike në Beograd, thotë se është e kot të pritet normalizimi pa bisedime për statusin e Kosovës dhe zyrtarizimin e nivelit të marrëdhënieve Beograd-Prishtinë.

‘Nuk ka nevojë për vazhdimin e një dialogu teknik në Bruksel pa folur për çështje thelbësore që është statusi i Kosovës, definimi i marrëdhënieve afatgjata në mes të Serbisë e Kosovës nuk mund të flitet për librat e administratës dhe bashkëpunimin ekonomik pasi kjo ka dështuar.’- shprehet Stefan Surliq, Fakulteti i Shkencave Politikë, Beograd.

Kosova ka krijuar një grup negociator, por në Serbi nuk është bërë një gjë e tillë. Serbia shpreson që kritikat nga Uashingtoni në Prishtinë do ta ndihmojnë për taksën edhe pse është shprehur pesimizëm për idenë serbe të quajtur “kompromis”. /Idro Seferi, Beograd/

Dedaj: Të mbyllen plagët e Ballkanit

Me rastin e 11 vjetorit të pavarësisë së Kosovës, ambasada e Republikës së Kosovës në Maqedoni mbrëmë organizoi pritje solemne në hotelin Aleksandar Palace. Në fjalimin e tij para të pranishmëve, ambasadori i Kosovës në Shkup, Gjergj Dedaj vlerësoi se Ballkani po kalon momente të rëndësishme historike dhe theksoi interesimin e Kosovës për bashkëpunim dhe fqinjësi të mirë me Maqedoninë. /Agjencitë/

Akademiku lë gjurmë të pashlyeshme në Gjuhësi

Një lajm i hidhur. Bëhet e ditur se sot në Prishtinë, në moshën 102 vjeçare, ka ndërruar jetë akademiku Idriz Ajeti.

Akademia e Shkenca dhe Arteve të Kosovës, me këtë rast e vlerëson lartë kontributin e akademikut Idriz Ajetit në fushën e gjuhësisë, por edhe si intelektual, pedagog dhe veprimtari i palodhshëm në zhvillimet tona shoqërore. I ndjeri ishte anëtar i Akademisë së Shkencave dhe të Arteve të Kosovës dhe kryetar i saj në dy mandate, anëtar nderi i Akademisë së Shkencave të Shqipërisë, dijetar e erudit, personalitet shkencor. Akademia e Shkencave dhe e Arteve e Kosovës vlerëson se pa kontributet e tij studimet albanologjike në Kosovë e më gjerë nuk do të ishin këto që janë sot. Akademiku Ajeti ishte dhe mbetet njëra nga figurat më të ndritshme të historisë sonë të re.

Lindi në Tupallë të Jabllanicës së Epërme, me 27 janar 1917. Shkollën fillore e kreu në Banjë të Sijarinës, të mesmen në Shkup, më 1938. Po atë vit u regjistrua në Fakultetin e Filozofisë të Universitetit të Zagrebit, në Degën e Romanistikës.

Studimet i mbaroi pas Luftës së Dytë Botërore, më 1949 në Fakultetin e Filozofisë të Universitetit të Beogradit. Deri në vitin 1953 ishte profesor i gjuhës shqipe në Gjimnazin e Prishtinës. /Klan Maqedoni/

Nikola Kaliniq thotë kosova nuk është serbe

Ndërsa pritet vazhdimi i dialogut Kosovë-Serbi për arritjen e një marrëveshje të qëndrueshme për normalizimin e marrëdhënieve dypalëshe, një deklaratë e basketbollistit serb Nikola Kaliniq, për Kosovën, është pasuar me sulme tepër të ashpra. Kaliniq ka bërë thirrje për pajtim dhe që të pranohet realiteti se Kosova nuk është territori i Serbisë.

Ky është Nikola Kaliniq, një sportist-basketbollist i shquar që luan për skuadrën turke të Fenerbahçes dhe mbronë ngjyrat e përfaqësueses kombëtare të Serbisë. I lindur në qytetin e Suboticës në krahinën e Vojvodinës, ai ka bërë emër në këtë sport dhe pak kush e dinë se është i biri i një pingpongisti të njohur, Zoran Kaliniq. Idhulli i shumë të rinjve, Kaliniqi i riu, këto ditë është gjetur në qendër të vëmendjes së publikut jo vetëm në Serbi, por mund të thuhet edhe në hapësirat e gjithë ish-federatës jugosllave. Sebep për këtë ishte një intervistë për median në Beograd në të cilën foli shumë açik për çështje që lidhen me politikën dhe saktësisht me Kosovën:

‘Që kur di për veten, e kam lindur më 1991, ekzistojnë probleme dhe dallime rreth Kosovës. Jam i vetëdijshëm se tani shumëkush do të më marrë inat, por është koha që dikush të thotë botërisht: Hajdeni të zgjidhim këtë problem, të nxjerrim çka mundemi, dhe të vazhdojmë. Beteja e Kosovës ishte para më shumë se 600 vjetësh dhe ka shumë dekada që ajo nuk është territori ynë. Askush nuk jeton nga e shkuara dhe sa më parë të pajtohemi me të sotmen dhe të vazhdojmë përpara, më mirë do të jetë për ne,’- ka deklaruar Kaliniq javën e kaluar për të përditshmen serbe Blic, duke tërhequr vërejtjen se serbët nuk janë popull qiellor, por vetëm një pikë e parëndësishme në hartën e madhe të botës.

Një qasje e këtillë ka shqetësuar shumë qarqet nacionaliste serbe, gjithandej vendit. Kështu, në vendlindjen e tij në Suboticë, kanë gdhirë grafite ofenduese kundër Kaliniqt duke i vënë edhe nofkën ‘turk’, duke e quajtur Mustafa dhe duke i rekomanduar të kalojë në fenë islame dhe të përjashtohet nga përfaqësuesja kombëtare! Fushata kundër tij nuk po qetësohet as pas reagimit të presidentit serb, Aleksadar Vuçiq se ‘fakti që dikush ju dënon një ditë, nuk do të thotë se kështu do të gjykojnë edhe brezat që vijnë’. Vetë basketbollisti i njohur, ndërkaq si kundërpërgjigje ka zgjedhur një status të këngëtarit me origjinë malazeze, Antonije Pushiq, të njohur si Rambo Amadeus, sipas të cilit ‘Nacionalizmi është temë për ata që kanë deri 300 euro të ardhura në muaj. Atyre iu servohet kjo përrallë. Kur paga kalon 500 euro, atëherë hapet muhabeti për gardërobën dhe kafenetë. Kur kapërcen një mijë euro, atëherë temë bosht është ushqimi i shëndetshëm, pushimet verore e dimërore, ndërsa kur ngritet në mbi tre mijë, atëherë përfundon çdo llomotitje. Njerëzit atëherë flasin për parashikimin e motit dhe për dashurinë!’

Publicisti serb Dragan Banjac, ndërkaq me të drejtë pyet: përse për Kosovën kështu flet vetëm një sportist! /Seladin Xhezairi/

Kuvendi i Shqipërisë të enjten pritet ta ratifikojë Protokollin për anëtarësimin e Maqedonisë në NATO. Kryeparlamentari Gramoz Ruçi pas takimit me të ngarkuarin me punë të Maqedonisë në Tiranë, deklaroi se Shqipëria ashtu siç ka premtuar do të jetë ndër vendet e para që do të ratifikojnë Protokollin.

Komisioni i Ligjeve në Parlamentin shqiptar ka votuar në formë unanime për protokollin e anëtarësimit të Maqedonisë së Veriut në Aleancën e Atlantikut të Veriut. Me një konsensus të plotë, anëtarët e opozitës dhe të maxhorancës votuan pro protokollit, i cili i hap rrugë shtetit të Maqedonisë së Veriut për t’ju bashkuar kësaj aleance si anëtarja e 30-të.

Ky miratim i ndez dritën jeshile Kuvendit të Republikës ditën e enjte, i cili pritet të ratifikojë po ashtu unanimisht për një kapitull të ri të shtetit fqinj. Në seancën e së enjtes në Parlamentin shqiptar pritet të jetë i pranishëm edhe kreu i Kuvendit të Maqedonisë, Talat Xhaferi. Nga ana tjetër, të premten e shkuar, Parlamenti grek ratifikoi protokollin për anëtarësimin e Maqedonisë së Veriut në NATO duke i dhënë fund një klime të tensionuar, që ka mbajtur konfliktin e “ndezur” në Greqi e Maqedoni për më shumë se dy dekada. /Klan Maqedoni/

Çështja e bisedimeve me Serbinë dhe platforma për këtë fazë të dialogut, e cila do të prezantohet së shpejti në Kuvend, u tha se ishin temat qendrore të një takimi të krerëve më të lartë të shtetit të Kosovës.

Takimi u thirr nga kryetari i Kuvendit të Kosovës, Kadri Veseli, ku morën pjesë: presidenti Hashim Thaçi, kryeministri Ramush Haradinaj, bashkëkryesuesi i delegacionit të Kosovës në bisedime, Fatmir Limaj, si dhe anëtarët e delegacionit Enver Hoxhaj dhe Visar Ymeri. “Në këtë takim është diskutuar për procesin e fazës finale të dialogut, me theks të veçantë për platformën e dialogut, e cila pritet të miratohet së shpejti në Kuvendin e Kosovës”, thuhet në një komunikatë të lëshuar zyra e kryetarit të Kuvendit, Kadri Veseli.

Pjesëmarrësit në takim, thuhet në komunikatë, u pajtuan se të gjithë përfaqësuesit e institucioneve të Kosovës nga pozita dhe opozita duhet të bëhen bashkë në mbështetje të platformës së dialogut, ndërkaq u theksua se uniteti i skenës politike kosovare e forcon pozicionin ndërkombëtar të Kosovës në procesin e dialogut.

Bisedimet për normalizimin e marrëdhënieve midis Kosovës dhe Serbisë janë ndërprerë prejse Kosova u ka vënë taksë 100% prodhimeve të importuara nga Serbia dhe Bosnjë Hercegovina, nëntorin e kaluar. Presidenti i Serbisë, Aleksandar Vuçiq, ka thënë se bisedimet nuk do të vazhdojnë pa u hequr taksa. Shtetet e Bashkuara i kanë bërë thirrje Kosovës që ta heqë këtë masë, duke thënë se ajo nuk përkon me interesat amerikanë. /Klan Maqedoni/

Njësitë speciale të Bosnjë Hercegovinës janë në kërkim të një vrasësi të shumëfishtë i cili është duke shkaktuar panik në mesin e popullatës. Ai dyshohet se mbrëmë ka vrarë një polic në detyrë, kurse paraprakisht ka vrarë edhe një person tjetër dhe nënën e tij.

Në vendin Ushivak në afërsi të Haxhiqit në Bosnjë Hercegovinë, mbretëron frikë tek popullata për shkak të arratisjes së një vrasësi serial, i cili dyshohet se mbrëmë ka vrarë edhe një polic – njoftojnë mediat e Bosnjës. Sic thuhet, rrugët janë ta zbrazëta, kurse njerëzit janë të mbyllur nëpër shtëpitë. Mbrëmë është vrarë edhe një polic 48 vjecar, kurse supozohet se veprën e ka bërë pikërisht i arratisuri. Siç shkruajnë mediat boshnjake bëhet fjalë për Edin Gaçiq.

Një numër i madh i policëve janë duke zhvilluar kërkime në vendngjarje, kurse në këtë aksion marrin pjesë edhe helikopterët. Sips Ministrisë së Brendshme, ekipe të shumta mbrëmë kanë hetuar terrenin rreth vendit të vrasjes. Polici i vrarë ishte gjetur mbrëmë në një fshat, derisa ka qenë duke bërë roje në një poligon për trajnim të policëve. Trupin e tij të pajetë e kishte gjetur kolegu i tij. Para gjashtë ditëve, Gaçiq kishte vrarë një person tjetër, pas çka ishte shpallur fletarresti kundër tij, kurse popullata është duke kërkuar ndihmë. Paraprakisht ai kishte vrarë edhe nënën e tij. /Klan Maqedoni/