close

Rajoni

Rajoni

SHQIPËRI: LAZARATASIT ME ‘ËNDRRËN AMERIKANE’!

no thumb

 

Dikur më i pasuri në Shqipëri, tashmë Lazarati është kthyer në një fshat pa shpresë. Rreth 240 banorë apo 15 për qind e gjithë popullsisë së fshatit kanë aplikuar për lotarinë amerikane

Lazarati sot me 5 mijë banorë, është fshati në i madh në jug të Shqipërisë.  Sipas banorëve, prej 6 muajsh 60 familje janë larguar në Gjermani, Itali dhe Francë, ndërkohë të tjerë janë bashkuar me familjet e tyre në SHBA-të ku ka një numër të konsiderueshëm lazaratasish.

Shumë të tjerë kanë aplikuar për lotarinë amerikane me shpresë se do ta shijojnë atë që quhet ‘ëndërr amerikane’. Ndërkohë, për një jetë më të mirë shumë të rinj janë larguar drejt Tiranës, apo zonave të tjera të mëdha urbane. Shpresa ka humbur fare e tok me të edhe e ardhmja e cila për ta është tepër e zymtë. Ata pak persona që kanë mbetur, i janë rikthyer një tradite të vjetër, të mbledhjes së bimëve mjekësore në mal.

Lazarati tashmë nuk është një fshat i “rrezikshëm”, çka e vërteton mungesa e patrullave të policisë. Kjo mesa duket, ka ardhur si pasojë e vendosjes së rendit dhe qetësisë publike këtë qershor. Kujtojmë që më 24 qershor të këtij viti, gjatë një përplasje me armë të policisë me një bandë droge, humbi jetën një efektiv i policisë shqiptare. Kjo ishte ndërhyrja e dytë e policisë në fshatin e njohur “si Kolumbia e drogës”. Në qershor të 2014-ës policia u fut për herë të parë në Lazarat në një super-operacion antikanabis që hasi në rezistencën e armatosur të kultivuesve të kësaj bime narkotike./Agjencitë e lajmeve/

 

 

read more
Rajoni

ATHINË: QEVERIA KRITIKOHET PËR REFUGJATËT  

no thumb

Kryeministri grek, Aleksis Tsipras ka përshëndetur marrëveshjen e arritur ndërmjet Brukselit dhe Ankarasë për çështjen e refugjatëve, si dhe hapjen e kapitujve në negociatat për anëtarësim të Turqisë në BE.Ndërsa është prezantuar si një partizan i flaktë për marrëveshjen me Turqinë, Tsipras ka dështuar të marrë konsensusin e plotë të partive greke për menaxhimin e flukseve të refugjatëve dhe emigrantëve. Kronikë e bashkëpunëtorit të TV Art në Athinë, Robert Goro.

Në një tryezë të drejtuar nga presidenti i Greqisë, Prokopis Pavlopulos, partitë parlamentare greke janë bashkuar në theksimin e nevojës për inciativa nga ana e Bashkimit Europian. Por gjithë partitë opozitare kanë rritur tonet e kritikave ndaj kabinetit të kryeministrit Aleksis Tsipras, duke theksuar se ka qenë politika ineficente e kësaj qeverie që ndikoi në rritjen e flukseve gjatë muajve të fundit.

Partitë kanë shprehur kritika edhe për ndërtimin e pikave të pritjes së refugjatëve, hot spoteve, duke e ndërlidhur këtë me marrjen e konsensusit nga komunitetet lokale. Por në të gjitha zonat e programuara, ndërtimin e pikave të pritjes, banorët kanë kundërshtuar vazhdimisht.

Pavarësisht kësaj, ministri grek i emigracionit, Janis Muzalas, ka deklaruar se deri në fund të vitit do të jenë gati tre nga pesë pikat e pritjes, në ishujt që përballen me flukset më të mëdha të refugjatëve dhe emigrantëve.

Muzalas shtoi se në të njëjtën kohë, në Greqinë e veriut dhe në Atikë do të përgatitet infrastruktura për qëndrimin e përkoshëm të 5.000 refugjatëve që më pas do të avancojnë për në Europë, në zbatim të programit të ristemimit nëpër vende-anëtare të BE-së. Gjithashtu, qeveria greke do të implementojë edhe programin e subvencionimit të qerasë për 20.000 refugjatë, një iniciativë që do të financohet nga komisariati i lartë i OKB-së për refugjatët (UNHCR).

Sa i përket situatës në kufirin me Maqedoninë, mediat geke raportojnë se sot aty ka rreth 1.000 refugjatë dhe emigrantë, të cilëve nuk u lejohet kalimi. Ata e kanë gdhirë natën në kushte mjaft të vështira për shkak të temperaturës së ulët, dhe të mungesës së konditave më minimale për jetesë.

Duke filluar nga e hëna, policia greke u lejon udhëtimin drejt Idomenit vetëm refugjatëve që janë pajisur me dokumentin përkatës të identifikimit,- përfundon kronikën e tij bashkëpunëtori i TV Art në Athinë, Robert Goro.

 

 

read more
Rajoni

KOSOVË: ÇFARË FSHIHET PAS ZHVILLIMEVE TË FUNDIT?

no thumb

 

Qeveria e Kosovës ka bërë të ditur se marrëveshjet e arritura në Bruksel për bashkësinë e komunave serbe do të shqyrtohen, ndërsa çështja e përcaktimit të vijës kufitare me Malin e Zi do t’i nënshtrohet një ekspertize ndërkombëtare. Një vendim i këtillë, pason protestat e djeshme të opozitës që u shoqëruan me arrestimin e rreth njëqind personave, në mesin e të cilëve është edhe ish-lideri i Lëvizjes Vetëvendosje, Albin Kurti. Redaktori i të përditshmes autoritative zvicerane, TAGESCAIGER  Enver Robelli, thotë për Televizionin Art se shkaqet për zhvillimet e javëve të fundit janë më të thella se pakënaqësia e opozitës me marrëveshjen për bashkësinë e komunave me shumicë serbe të popullsisë dhe për përcaktimin e vijës kufitare me Malin e Zi.

Analisti i njohur Enver Robelli, thotë se pamjet e djeshme nga Prishtina kanë qenë të tmerrshme dhe sit ë tilla nuk duhej të ndodhnin.Ai flet me tone kritike për atë që e quan ndërhyjre të vrazhdët të policisë, por edhe për sjelljen e njërit prej liderëve të opozitës kosovare Albin Kurtin. Kjo thotë Robelli, nuk duhej të ndodhte pikërisht në Ditën e Flamurit për të cilën shqiptarët, kudo që janë, ushqejnë ndjenja të thella të respektit.

Robelli thotë se rrënjët e tensioneve më të fundit në skenën politike e parlamentare të Kosovës janë përtej pakënaqësisë së opozitës me marrëveshjet e arritura me ndërmjetësin ndërkombëtar për bashkësinë e komunave me shumicë serbe të popullsisë dhe për përcaktimin e vijës kufitare me Malin e Zi.

Karshi kësaj, analisti i njohur beson se opozita nuk poi a del të imponohet si e besueshme para elektoratit. Konfrontimi me gaz-lotësjellës – edhe në parlament – nuk është mjet që e nderon atë.

Po ku qëndron rrugëdalja nga situata e krijuar? Robelli çmon se në Kosovë nuk ka autoritete të cilat do të impononin zgjidhje të qëndrueshme që do të dilnin nga një debat i gjerë politik.

Dhe, lajmi i fundit nga Prishtina është se qeveria e Kosovës ka reflektuar.  Kabineti i Kryeministrit Mustafa ka bërë të ditur se marrëveshjet e arritura në Bruksel për bashkësinë e komunave serbe do të shqyrtohen, ndërsa çështja e përcaktimit të vijës kufitare me Malin e Zi do t’i nënshtrohet një ekspertize ndërkombëtare./Tv Art/

read more
Rajoni

PRESIDENTI NISHANI: TË MOS BOSHATISET SHQIPËRIA!

no thumb

Në Tiranë, Presidenti Bujar Nishani në pritjen zyrtare për festën e Pavarësisë ka bërë thirrje për bashkëpunim në mënyrë që Shqipëria të eci përpara. Presidenti Nishani tha se duhet të konsolidohet drejtësia dhe institucionet, duke i dhënë fund kohës kur, sikurse është shprehu ai,  padrejtësitë i bëjnë ata që pretendojnë se bëjnë drejtësi!

Në ceremoninë zyrtare kushtuar 103-vjetorit të Pavarësisë së shtetit shqiptar, Presidenti i Republikës, Bujar Nishani ka deklaruar se vendi ndodhet para një faze delikate të historisë. Kreu i shtetit u bëri thirrje shqiptarëve që të mos e braktisin vendin, ndërkohë që la të kuptohet se kur politikanët t’ia dalin të bëjnë shtet, do të jenë shumë pak qytetarë në këtë vend.

Presidenti, me këtë rast, tërhoqi vërejtjen se, sikurse u shpreh, Shqipëria dhe shqiptarët sot ndodhen në një fazë delikte të historisë tonë moderne.Së këndejmi, ai nënvizoi domosdoshmërinë e vendosjes së shtetit të së drejtës.

Së këndejmi angazhimi i presidentit ishte që të bëhet çmos për forcimin e institucioneve, përfshirë këtu dhe thellimin e reformave në drejtësi si dhe për të larguar të inkriminuarit nga politika. Në ceremoninë e organizuar në Pallatin e Brigadave, krahas  diplomatëve të akredituar në Tiranë, merrnin pjesë edhe përfaqësues nga hapësirat shqiptare përtej shtetit shqiptar./Agjencitë e lajmeve/

read more
Rajoni

KOSOVË: FAMILJA JASHARI THIRRJE PËR UNITET

no thumb

Shënimi i ditës së flamurit shqiptar nga liderët të institucioneve më të larta të Republikës së Kosovës ka filluar sot me vizita dhe homazhe në Kompleksin memorial “Adem Jashari” në Prekaz, familje kjo e cila dha mesazh për bashkim.

Kryetari i Kuvendit të Republikës së Kosovës, Kadri Veseli së bashku me disa deputet vunë kurora lulesh në kompleksin memorial në Prekaz. Nga aty, Veseli ka vlerësuar lartë veprën dhe rënien e komandantit Adem Jashari. Sipas Veselit shteti i Kosovës është duke përparuar sa i përket integrimeve të më tutjeshme.

Prekazin e vizitoi gjithashtu edhe ministri i FSK-së, Haki Demolli, i cili 28 Nëntorin e cilësoi ditë për përkujtim të komandantit Adem Jashari.

Përfaqësuesi i familjes Jashari, Rifat Jashari ka falënderuar të gjithë ata që kontribuojnë për vend, duke bërë thirrje për unitet.

Ndryshe, Prekazin e vizituan edhe përfaqësues të tjerë të institucioneve lokale dhe qytetarë të Kosovës e më gjerë./KosovaPress/

read more
Rajoni

RAMA: FSK-ja KONTRIBUT PËR PAQE!

no thumb

 

Komandanti i Forcës së Sigurisë së Kosovës, gjeneral nënkoloneli Rrahman Rama, u prit në takim nga shefi i shtabit të Ushtrisë së Maqedonisë, gjeneral-nënkolonel, Metodija Veliçkovski.

Komandanti i FSK-së në Shkup u prit nga Garda Ceremoniale e ushtrisë së Maqedonisë, ku pastaj zhvilloi një takim me Shefin e Shtabit të kësaj ushtrie.

Ata u pajtuan që bashkëpunimi mes të dy vendeve, përkatësisht të dy forcave të armatosura të vazhdojë edhe më tutje, e edhe të rritet, veçmas në trajnime, shkollime, mjekësi e pjesëmarrje në iniciativa rajonale.

Rama, pas takimit, në konferencën e mbajtur për shtyp, tha se synim i FSK-së është të jetë pjesë e të gjitha iniciativave rajonale, që siç tha ai, kjo është në të mirën e të gjitha vendeve.

Komandanti i FSK-së tha se diskutuan edhe për mundësinë e shkëmbimit të informacioneve dhe eksperiencave.

Shefi i Shtabit të Ushtrisë së Maqedonisë, Metodija Veliçkovski, shprehu gatishmërinë për bashkëpunim të mëtejmë me FSK-në.

Komandanti i FSK-së, u prit edhe nga zëvendësministri i Mbrojtës së Maqedonisë, Hilmi Selami, ku në takim mori pjesë edhe zëvendës shefi i shtabit gjeneral-major Muhamet Racaj.

Gjatë ditës së sotme, në Maqedoni, gjeneral Rama vizitoi edhe Akademinë e Mbrojtës dhe Qendrën e Trajnimit për pilot në Petrovec./Agjencitë e lajmeve/

read more
Rajoni

ZAGREB: XHO BAJDEN PËR AGJENDËN!

no thumb

Në Zagreb është mbajtur takimi i jashtëzakonshëm i krerëve të Procesit Brdo-Brioni ku kanë marrë pjesë të gjithë krerët e vendeve të Evropës juglindore, nënkryetari i SHBA-ve Xho Bajden, Kryetari i Këshillit Evropian Donald Tusk dhe Kryetari austriak Hajnc Fisher.

Tema të samitit kanë qenë përforcimi i stabilitetit, sigurisë si dhe përparimi ekonomik i Evropës Juglindore – është thënë pas këtij takimi që ka zgjatur diç më shumë se dy orë.

Aktorët e procesit presidencial Brdo-Brioni kanë rënë dakord që për arritjen e këtyre synimeve, nevojitet procesi i përforcimit të partneritetit transatlantik SHBA-BE, zgjerimi i BE-së me vendet kandidate si dhe zgjerimi i NATO-s.

Në këtë takim është konkluduar se gjatë dhjetëvjeçarit të kaluar në Evropën juglindore ka ardhur deri tek përforcimi i institucioneve demokratike, përmirësimi i marrëdhanieve ndërfqinjësore dhe dialog i hapur i shoqërisë civile dhe udhëheqësve politik.

Kriza aktuale e refugjatëve në këtë samit është paraqitur nga aspekti humanitar dhe i sigurisë, që nënkupton mbikëqyrje më të mirë dhe mbrojtje të kufijve të jashtëm të BE, në llogari të zvogëlimit të presionit të krizës ndaj vendeve që janë të përfshirë me fluksin e refugjatëve.

Ashpër janë dënuar sulmet në Paris, si dhe ato në Ankara, Sinaj, Bejrut e Bamako, kurse anëtarët e këtij procesi kanë porositur se angazhohen për zgjidhje globale të shkaqeve të radikalizmit, ekstremizimit dhe terrorizmit.

Nënkryetari amerikan Xho Bajden ka nënvizuar se Evropa Juglindore është e një rëndësie të veçantë dhe se interesi i SHBA-ve për këtë rajon asnjëherë nuk është zvogëluar./TvArt/

 

read more
Rajoni

SHQIPËRI: AMBASADORËT PËR ”SHQIPËRINË E PAS KOMUNIZMIT”

no thumb

 

Në Simpoziumin e organizuar sot “Shqipëria pas Komunizmit” janë mbledhur  shumë përfaqësues ndërkombëtarë rreth një tryeze ku është biseduar për vendin dhe arritjet.

Ndër të tjerë të pranishëm ishin ambasadorja e BE-së Vlahutin dhe ambasadori i OSBE-së Rauning.

Pas 25 viteve “Shqipëria nuk mundet më të harxhojë kohë dhe energji me politika jo të duhura. Nuk është në interesin e saj dhe as të BE-së” u shpreh ambasadorja e BE-së, në një deklaratë Romana Vlahutin.

Ndërkaq ambasadori i OSBE-së Florian Raunig, theksoi se 25 vite janë pak në histori, por shumë në jetën e një individi “edhe sa duhet që të përmbushet program ambicioz për një shtet demokratik”./Agjencitë e lajmeve/

 

 

read more
Rajoni

KOSOVË: MUSTAFA – OPOZITA TË KTHEHET NË KUVEND  

no thumb

 

Kryeministri i Kosovës Isa Mustafa, ka kritikuar edhe njëherë veprimet e opozitës me të cilat po kundërshtojnë nënshkrimin e marrëveshjeve në Bruksel dhe Demarkacionin me Malin e Zi. Mustafa në një konferencë për media u kërkoi liderëve të opozitës që të kthehen në Kuvendin e Kosovës dhe të kuvendojnë ashtu siç i ka hije liderëve të një shteti demokratik.

Pamjet e dhunës, të gazit lotsjellës dhe të tjera veprime të opozitës janë të papranueshme për Isa Mustafën. Ai luti opozitën që të presin vendimin e Gjykatës Kushtetuese dhe të mos e bëjnë vetë gjyqësinë.

Me anë të një komunikate për media, Aleanca për Ardhmërinë e Kosovës vlerëson se sa i përket propozimit të kryeministrit për demarkacionin me Malin e Zi, ai duhet të japë informata shtesë. “Nëse kryeministri është i gatshëm që ta zgjidhë këtë çështje, atëherë nuk është e nevojshme të komplikohen gjërat. Ai duhet ta shkarkojë komisionin ekzistues, duhet ta zhvlerësojë punën e tij (marrëveshjen) dhe tek më pastaj të krijohet një komision i ri, edhe me ekspertë ndërkombëtarë edhe me ekspertë vendorë”, thuhet në reagimin e AAK-së./Agjencitë e lajmeve/

 

read more
Rajoni

GREQI: MË PAK EMIGRANTË NË KUFIRIN ME MAQEDONINË  

no thumb

 

Mediat greke raportojnë për një prani më të pakët të emigrantëve në kufirin Greqi-Maqedoni, pas vendimit të autoriteteve të Shkupit për të lejuar kalimin vetëm të refugjatëve nga Siria, Afganistani dhe Iraku.

Shtetasit nga vende të tjera që ndodheshin për ditë të tëra në pritje, tashmë kanë filluar të largohen nga vendkalimi i Idomenit. Vetëm të hënën janë larguar 500 syresh, sipas mediave greke që po monitorojnë në vend situatën.

Bashkëpunëtori i Televizionit Art në Athinë, Robert Goro, njofton se autoritetet greke vlerësojnë se disa prej emigrantëve kanë vendosur të rikthehen në brendësi të Greqisë, ndërsa të tjerë po kërkojnë rrugëkalime të tjera, të pambrojtura drejt Maqedonisë, për të vazhduar aventurën e tyre.

Një tjetër mundësi është që pjesë e këtyre emigrantëve të drejtohet në territorin shqiptar, pavarësisht largësisë realtivisht të madhe, dhe të tentojnë që atje, kalimin e tyre për në Europë.

Sipas mediave greke, ata që kanë mbetur në zonë kanë krijuar një kamp provizor me çadra të ngritura në anë të linjës hekurudhore. Ata kërkojnë ndihmën e organizatave humanitare për të përballuar nevojat minimale të jetesës.

Ministri grek i emigracionit, që vizitoi zonën në fundjavë, deklaroi se qeveria ka një plan për zhvendosjen e tyre më në jug, në një hapësirë ku do të ofrohet edhe infrastruktura optimale. Mirëpo, 300 banorët e zonës ku planikfikohet të ndërtohet qendra e akomodimit kanë shprehur kundërshtimin e tyre energjik ndaj këtij vendimi të qeverisë./R. G./

 

read more
1 215 216 217 218 219 239
Page 217 of 239