Top Lajme

Pozita kërkon konstruktivitet, opozita ndryshime

Kuvendi votoi nevojën për sjelljen e ligjit të ri për parandalimin e korrupsionit dhe konfliktit të interesave. Ligji u dërgua në Komisionin për Çështje Evropiane, ndërsa kryetari i Kuvendit, Talat Xhaferi, menjëherë thirri seancë të re për vazhdimin e procedurës. Pozita po shpejton që ta sjell ligjin para shpalljes  së zgjedhjeve presidenciale, ndwrsa VMRO DPMNE nuk do t’i mbajë duart kryq.
Me 37 amendamente opozita do mundohet ta përmirësoj ligjin, dhe janë të mendimit se sugjerimet e tyre do të pranohen.

“Unë shpresoj që amendamentet do të kalojnë, sepse kemi biseduar me disa kolegë, edhe ata janë të mendimit se amendamentet janë konstruktiv. Shpresoj që do të mbizotërojë arsyeja, dhe do të pranohet amendamentet sepse qëllimi i përbashkët duhet të jetë ligj kualitativ dhe komision kualitativ nëse duam që të bëjmë hap përpara në këtë drejtim.“ Ane Llashkoska, Deputete e VMRO DPMNE-së.

Koordinatori i grupit parlamentar të LSDM-së, pranoi që ligji po hyn në procedurë për të dytën herë, por kjo si pas tij, është për shkak se janë inkorporuar edhe kërkesat e opozitës, dhe ligji është bërë më i mirë.

“Ne nuk mund të bëhemi peng të sjelljes së VMRO DPMNE-së. Nuk mund të vijmë në situata ku ata do të thonë, ose gjithçka do të pranoni ose asgjë nuk të përkrahim. Ky ligj është në interes të qytetarëve, në interes të shtetit dhe është patjetër që të kaloj.” shprehet Jovan Mitreski, Koordinator i Grupit Parlamentar të LSDM-së

Ligji i ri do të mundësojë që Komisioni i anti-korrupsionit të ketë qasje në llogaritë bankare të personave publik, por edhe kriteret për t’u bërë anëtarë i komisionit janë të larta. Personi që dëshiron të bëhet anëtarë i anti-korrupsionit duhet të ketë së paku 12 vjet përvojë pas përfundimit të arsimit të lartë. Ligji i ri po ashtu kërkon që anëtari i anti-korrupsionit të mos ketë qenë deputet, anëtar i Qeverisë, donator apo anëtari i ndonjë partie. /Furkan Saliu/

Qeveria e RM-së nuk komenton intervistën

Presidenti rus Vladimir Putin vlerëson se SHBA-të dhe disa vende tjera perëndimore me forcë dëshirojnë t’i fusin në NATO Maqedoninë dhe vendet tjera të rajonit që të realizojnë dominimin dhe se me këtë destabilizojnë jo vetëm këto shtete, por edhe gjithë rajonin.

Ai në intervistën për gazetat serbe “Veçernje Novosti” dhe “Politika”, në prag të vizitës në Serbi, deklaroi se Maqedonia, njëjtë sikurse Mali i Zi më herët, me forcë po futen në Aleancë, në kundërshtim me vullnetin e popullit.

“Vitin e kaluar, madje edhe filloi procesi i miratimit të amendamenteve kushtetuese dhe riemërimi i këtij shteti, revidimi i themeleve të identitetit kombëtar maqedonas për futjen me forcë të Maqedonisë në NATO. Ishte injoruar vullneti i votuesve, referendumi nuk kishte sukses, por presioni i jashtëm vazhdoi” – thotë presidenti rus Putin në këtë intervistë ku përmend miqtë ballkanik të Rusisë, pa përmendur Maqedoninë në këtë kontekst, edhepse thotë se Rusia edhe mëtej do t`i përkrah lidhjet miqësore të Ballkanit.

Zëdhënësi i qeverisë Muhamed Hoxha i pyetur për të komentuar intervistën e Presidentit rus për mediat serbe, ka theksuar se Qeveria e Maqedonisë nuk komenton intervista të burrështetasve të huaj.

“Ne nuk komentojmë intervista të personaliteteve ngase Qeveria e RM-së është e përkushtuar në qëllimin e saj, anëtarësimin në NATO DHE be. Me ratifikimin e Marrëveshjes së Prespës, kurse presim që ai të ratifikohet edhe në parlamentin grek, Maqedonia do ta realizojë atë që tashmë e ka në planin e saj, rruga drejt NATO-s dhe BE-së.” shprehet Zëdhënësi i qeverisë Muhamed Hoxha.

Ndërkaq rreth kësaj çështjeje ka pasur reagime edhe nga diplomacia ruse. Ministri i Punëve të Jashtme, Sergej Llavrov ka deklaruar se Moska nuk është kundër emrit të ri të Maqedonisë, por ka dyshim rreth legjitimitetit të tërë procesit. /Klan Maqedoni/

Opozita dhe pozita sërish përplasen

Qeveria ende nuk e ka shumë të saktë se sa do të kushtojë ligji për përdorimin e gjuhëve. Zëdhënësi i Qeverisë, Muhamed Hoxha, tha se vetë institucionet duhet të bëjnë analizat se si do të përmbushin detyrimet financiare për zbatueshmërinë në praktikë të ligjit të ri.

“Nuk e kemi shumë të saktë se sa do të kushtojë, 100mil denarë për themelimin e institucioneve për zbatimin e ligjit.” deklaroi Muhamed Hoxha, Zëdhënës i Qeverisë

Ndërkohë, VMRO-DPMNE-ja opozitare vazhdon kundërshtimin e ligjit.  Deputeti i saj, Nikolla Miceski, në një klonferencë shtypi, duke iu referuar vërejtjeve të presidentit Ivanov për ligjin, nuk la pa folur as për aspektin financiar dhe kohor të zbatimit të tij.

‘Ky ligj do t’i bllokojë institucionet të cilat në vend se të punojnë, do të duhet të përkthejnë dhe të mbajnë arkiva të dyfishta, që do t’i kushtojë shtetit, qytetarëve, kohë, hapësira, resurse njerëzore dhe para.’  shprehet Nikolla Miceski, Deputet i VMRO DPMNE-së

Deputeti i LSDM-së, Kostadin Kostadinov, duke dalë në mbrojtje të ligjit, tha se koha e mbjelljes së urrejtjes dhe nacionalizmit ka përfunduar.

“Partia që ishte 11 vjet në pushtet dhe i shkatërroi të gjitha themelet e këtij shteti, partia e cila nuk ofroi asnjë alternativë për përparim të shtetit, por vetëm bojkotime, regres, protesta të cilat ishin të përkrahura nga një grup i margjinalizuar i njerëzve, tani po dëshiron që ta prish edhe konceptin “Një shoqëri për të gjithë” –vlerëson Kostadin Kostadinov, Deputet i LSDM-së.

Kuvendi mbajti seancën e parë pas publikimit të ligjit në Gazetën Zyrtare, por kreu i tij, Talat Xhaferi, atë e drejtoi vetëm në gjuhën maqedonase. /Furkan Saliu/

Sërish përplasje VMRO-LSDM rreth Ligjit për Gjuhët

Lideri i VMRO-DPMNE-së opozitare Hristijan Mickoski në intervistën për televizionin ALFA ka bërë të ditur se partia të cilën e drejton nuk do t’i bojkotojë zgjedhjet e ardhshme presidenciale duke përsëritur kërkesën për zgjedhje të jashtëzakonshme parlamentare.

“VMRO-DPMNE do të merr pjesë në zgjedhjet presidenciale dhe do të fitojë në këto zgjedhje, dhe këtu nuk kemi asnjë dilemë dhe as që do të kemi. Ne gjithashtu kemi kërkuar edhe zgjedhje të parakohshme parlamentare, për shkak se kemi një parlament ku të zgjedhurit e popullit, mbrohen nga populli me anët policisë”–tha Hristijan Mickoski – Kryetar i VMRO – DPMNE-së.

Publikimin në Gazetën Zyrtare të Ligjit për Gjuhët dhe ratifikimin e Marrëveshjes së Prespës, kreu i opozitës e quajti të jashtëligjshme, duke shtuar se Kryeministri Zoran Zaev dhe Kryeparlamentari Talat Xhaferi kanë kryer “atentat” ndaj Maqedonisë.

“Para Gjykatës Kushtetuese si parti politike do të ngrejmë procedurë për vlerësimin e kushtetutshmërisë së këtij ligji dhe njëkohësisht u bëmë thirrje të gjitha institucioneve pa marrë parasysh nëse janë në nivel qendror apo lokal, ta bojkotojnë e ta injorojnë operacionalizimin e këtij ligji në punën e tyre”- deklaroi Hristijan Mickoski – Kryetar i VMRO – DPMNE-së.

Kanë reaguar nga LSDM-ja. Socialdemokratët përmes një komunikate kanë theksuar se Ligji për përdorimin e gjuhëve është konform kushtetutës dhe është një kontribut serioz në ndërtimin e konceptit “një shoqëri për të gjithë”.

“LSDM-ja u përcaktua për politika që i japin fund ndasive dhe ndërtojnë Maqedoninë si shtet qytetar ku të gjithë do të jetojnë në të. Me përparimin e të drejtave për përdorimin e gjuhëve, askush nuk humb, por mundësohen kushtet për komunikim më të mirë mes qytetarëve dhe institucioneve.”- kanë reaguar nga LSDM-ja.

Nga LSDM-ja gjithahstu kanë theksuar se VMRO-DPMNE-ja opozitare dhe lideri i saj Mickoski nuk kanë arritur ta bllokojnë anëtarësimin e vendit në BE dhe NATO, duke akuzuar drejtuesit e kësaj partie se ende janë duke marrë urdhëra nga Budapesti, duke aluduar në ish-Kryeministrin Gruevski. /Klan Maqedoni/

Kryeministri grek disponon me votat e nevojshme

Qeveria Tsipras pritet të fitojë votëbesimin në një procedurë që do të zhvillohet afër mesnatës së të mërkurës. Konsiderohet e sigurt se kryeministri grek disponon 151 votat e nevojshme. 145 nga deputetët e SYRIZA-s në pushtet dhe 6 votat e tjera nga 6 deputetë të forcave të tjera politike, katër prej të cilëve nga partia Grekët e Pavarur të Panos Kammenos. Tsipras e kërkoi votëbesimin menjëherë pasi zoti Kammenos shpalli largimin nga koalicioni qeveritar.

Pikërisht akuzat dhe kundërakuzat për trafikim deputetësh kanë dominuar në debatin parlamentar përkatës. Çështja tjetër që gjithashtu dominoi lidhej me marrëveshjen e Prespës dhe dyshimet se Tsipras synon që ajo të miratohet nga parlamenti para datës 20 janar. Në këtë datë është paralajmëruar një manifestim mbarëkombëtar proteste në sheshin Syntagma para parlamentit.

Burime parlamentare thanë për TV Klan se qeveria planifikon që Marrëveshja e Prespës të kalojë nga komisioni përkatës i parlamentit të enjten dhe pastaj të shkojë për votim në një seancë plenare, të premten apo të shtunën. Ndërkaq, burime qeveritare e konsideruan këtë skenar si të pamundur, duke theksuar se procedurat parlamentare nuk mund të reduktohen në mënyrë kaq drastike. Gjithsesi, burimet qeveritare thanë se synimi i kryeministrit është që një seri çështjesh të kryhen sa më shpejt dhe pa intervale ndërmjet tyre.

Duke filluar nga  votëbesimi i qeverisë, votimi i marrëveshjes së Prespës dhe riformatimi i kabinetit qeveritar pas largimit të partisë së Kammenos. Tsipras gjykon se në këtë mënyrë do të përmirësohet klima politike, çka do të jetë dhe një sinjal pozitiv për tregjet financiare që kanë një lloj rezerve ndaj Greqisë, për shkak të zhvillimeve të fundit. /Roberto Goro, Athinë/

Brukseli pret propozime të reja

Kryeministrja britanike Tereza Mej ballafaqohet me votëbesim, prej se mbrëmë deputetët e Vestminsterit e hodhën poshtë marrëveshjen e saj për Breksitin. Lideri i laburistëve opozitarë, Xheremi Korbin, propozimin e vendosi në tryezë me qëllim që të nxisë zgjedhje të parakohshme parlamentare pasi 432 deputetët të Dhomes së poshtme të Parlamentit votuan kundër planit të Mej-it, për daljen e Britanisë nga Bashkimi Evropian.

Rezultati i votimit të deputetëve në Vestminster nuk dihet, sepse disa “kryengritës” të partisë Konservatore në pushtet të Tereza Mejit si edhe deputetët e Partisë demokratike unionist të Irlandës së Veriut të cilët u shprehën se do ta përkrahin kryeministren. Votëbesimi pritet të fillojë rreth orës 19:00 sipas kohës lokale, respektivisht në orën 20:00 sipas kohës së Evropës së mesme. Tereza Mej para deputetëve tha se javën e ardhshme do të dalë me një plan alternativ për Breksitin, nëse e mbijeton votëbesimin e sotëm.

“Parlamenti e tha të veten, ndërsa kjo qeveri do t’i dëgjojë deputetët” tha mbrëmë ajo, pas numrimit të votave, duke ofruar bisedime ndërpartiake në mënyrë që të caktohen drejtimet e ardhshme.”– deklaroi Tereza Mej-Kryeministre e Britanisë

Kancelarja gjermane, Angela Merkel shprehu keqardhje për vendimin e Pralamentit Britanik kur votoi kundër marrëveshjes së breksitit të kryeministres Tereza Mej që e arriti me udhëheqësit e Bashkimit Evropian dhe se Brukseli tani i pret propozimet e reja të kryeministres britanike.

“Do të bëjmë ç’mos që të gjejmë zgjidhje të përshatshme, por jemi të përgatitur edhe nëse një gjë e tillë nuk ndodh.” –shprehet Angela Merkel – Kancelare e Gjermanisë.

Sipas analistëve politikë në Londër, Kryeministrja Tereza Mej është e vetëdijshme për sfidën dhe pret, nëse votëbesimin e sotëm e tejkalon që nesër duhet të fillojë serinë e takimeve me deputetë të “shquar” në Vestminster. Ata shtojnë se ajo është e gatshme t’i kthejë vijat e veta të kuqe- që do të thotë përjashtim i kërkesë së laburistëve për union doganor me BE, pa lënë hapësirë kompromisi për këtë çështje. Parlamenti britanik numëron 650 ulëse, por qeverisë i duhen 318 që të mbijetojë votëbesimin, sepse shtatë deputetët e partisë së Irlandës Shin Fejn nuk marrin pjesë në punimet e Parlamentit, katër spikerë nuk votojnë si dhe katër deputetë të tjerë të cilët i numërojnë votat. /Biljana Georgievska/

Nuk heqim dorë nga kërkesat tona!

Lëvizja anti – bixhoz, pas takimit me kreun e Kuvendit dhe anëtarët e Komisionit për financim dhe buxhet, informoi opinionin se të njejtit nuk i kanë përkrahur kërkesat e tyre, e konkretisht distancën e kazinove prej 3 km. Megjithatë, nga kjo lëvizje këmbëngulin në kërkesat e tyre dhe kërkojnë të zhvillojnë takim urgjent me liderët e partive politike.

Pas takimit me kreun e Kuvendit dhe deputetët të cilët janë anëtarë në Komisionin për financim dhe buxhet, nga Lëvizja Anti – Bixhoz, me anë të një press konference informuan publikun se kërkesat e tyre rreth ligjit për kazino nuk janë pranuar nga të njëjtit. E debatueshme mbetet distanca e kazinove nga institucionet publike. Prandaj, nga kjo Lëvizje kërkojnë takim urgjent me liderët e partive politike.

Përfaqësuesi i kësaj Lëvizje, Nuhi Ganiu, deklaroi se pavarësisht se deputetët iu kanë premtuar vetëm 500 metra largësi dhe Kryeparlamentari Talat Xhaferi vetëm 1 km, nga kjo lëvizje këmbëngulin që kazinot të vendosen 3 km larg institucioneve.

Deputeti Rexhail Ismaili i cili është anëtar në Komisionin për Financim dhe Buxhet, ditë më parë në deklaratën për televizionin tonë, deklaroi se për sot është dashur të vendoset data për debatin publik të ligjit për kazinot.

Ndërkaq deputeti Ismaili, i kontaktuar sot nga televizioni ynë, nuk dha detaje për anulimin e mbledhjes së sotme dhe për zvarritjen e datës së debatit publik. Siç ishte thënë paraprakisht, për Ligjin e Kazinove debati duhej të fillonte pas procesit të ndryshimeve kushtetuese. /Blerona Jakupi/

BE-ja për projektin ndan 250 mijë euro

Njëra nga detyrat reformuese të Maqedonisë, që është kërkesë e BE-së, është edhe lufta kundër falsifikimit të eurove. Në bashkëpunim me Bankën Popullore të Maqedonisë, MPB-ja përfshihet në këtë projekt të përkrahur nga Brukseli.

Maqedonia si aspiruese për integrimet në BE dhe NATO, sipas shembullit të vendeve anëtare, angazhohet për forcimin e rezistimit kundër falsifikimit të parave, në radhë të parë të eurove, por edhe me mënyra të tjera të luftës kundër krimit.

“Personalisht besoj fuqishëm se sa më shpejtë t’i ngrejmë këto kapacitete aq më parë do të futemi në procesin e bisedimeve por, njëkohësisht do t’i përforcojmë edhe institucionet tona me zmadhimin e kapaciteteve dhe stabilitetit të tyre, me çka do të rritet edhe besimi i qytetarëve.” –deklaroi ministri i Punëve të Brendshme Oliver Spasovski.

Zëvendës-guvernatorija e Bankës Popullore të Maqedonisë, Emilia Nacevska, thotë se institucioni i saj maksimalisht përkrahë këtë proces për mbrojtjen e euros, por edhe valutës së brendshme me shpresë se kjo gjë do të ndihmojë përfshirjen më të shpejtë në familjen evropiane.

“Vendosmëria e Bankës Popullore të Maqedonisë që me hapa të sigurtë të futet në sistemin evropian të Bankave Qendrore, duke i ndjekur çdoherë standardet dhe praktikat evropiane dhe duke i avancuar të gjithë segmetet e veprimtarisë së vet, paraqet njërin nga objektivat kryesore strategjike të institucionit tonë.” -deklaroi Zëvendës-guvernatorija e Bankës Popullore Emilija Nacevska.

Brukseli në luftën kundër eurove të falsifikuara futen në Maqedoni me një përkrahje prej 250 mijë eurosh.

“Kjo është detyrë të cilën duhet ta realizojnë të gjithë anëtarët e tanishëm dhe të ardhshëm të BE-së, si dhe ata të eurozonës, por kjo gjë nuk është e rëndësishme vetëm për ata. Përveç 360 milionë evropianë dhe 19 shtete anëtare të eurozonës, edhe 60 vende të tjera në botë, valutat e tyre kombëtare i lidhin me euron. Kjo është njëra nga valutat e rëndësishme ndërkombëtare, e cila përdoret edhe në rajonin më të gjërë të Ballkanit Perëndimor si valutë rezervë”- deklaroi euroambasadori Samuel Zhbogar.

Në komunikim me doganat e Maqedonisë lidhur me atë se sa raste të falsifikimit të eurove janë regjistruar, kuptuam se gjatë vitit 2018 e deri sot nuk ka mashtrime me eurot e rejshme, por policia në të shkuarën shumë herë ka regjistruar mashtrime të kryera nga nënshtetas të vendit dhe të huaj, nganjëherë edhe me shuma të majme. /Verica Dimitrievska/

“Nuk ndjej përgjegjësi, veprova sipas kompetencave”

Presidenti, Gjorge Ivanov në një kumtesë të lëshuar nga kabineti i tij, ka tërhequr vëmendjen e kryetarit të Kuvendit se me publikimin e Marrëveshjes së Prespës dhe Ligjit për Gjuhët në Gazetën Zyrtare, kanë bërë shkelje ligjore e cila ka bazë për ndjekje penale.

E kryetari i Kuvendit, Talat Xhaferi, ka vetëm një koment për kumtesën e Ivanovit.

“Me sa duket Presidenti në fund të mandatit është duke i përzier kabllot.” – tha Talat Xhaferi, Kryetar i Kuvendit. 
Ai tha që i ka dhënë kohë të mjaftueshme Ivanovit që t’i dekretojë ligjin dhe Marrëveshjen e Prespës, e meqë ai nuk e ka bërë, Kushtetuta mundëson që të publikohen vetëm me nënshkrimin e tij.
Sipas Xhaferit, Ivanovi është ai që e ka shkelë Kushtetutën.

Kryeparlamentari Xhaferi, tha që institucioni që ai udhëheq do ta rrespektojë ligjin dhe do t’i zëvendësoj tabelat e Kuvendit me tabela të reja, brenda afatit ligjor. /Furkan Saliu/