Video

Gabimisht është krijimi i përshtypjes se përcaktimi i datës për negociatat para aderuese mes Maqedonisë së Veriut dhe BE-së, varet nga puna e Komisionit për Cështje arsimore me Bullgarinë. Petar Todorov-anëtar i komisionit të përzier maqedono-bullgar që kërkon bazë të përbashkët për personalitetet historike, përpos që e vlerëson si “ultimatum të dëmshëm” kërkesën e Kryeministrit bullgar Borisov që deri në tetor Komisioni të gjejë zgjidhje për kontestin rreth trashëgimisë historike të Goce Dellçevit, shton se historianët në këtë problematikë me siguri se do të punojnë më shumë vite.

“Për këtë shkak me rëndësi për punën e komisioneve është që politikanët të qëndrojnë larg dhe t’ua lënë punën ekspertëve. Atë moment kur vetë anëtarët e komisionive janë ulur të debatojnë për diçka, do të thotë se janë ulur të kërkojnë zgjidhje. Dhe nuk ka nevojë nga ultimatume dhe afate” –tha Petar Todorov, historian.

Krijimi i atmosferës nga rezultati i punës së komisionit për çështje historike varet fillimi i negociatave para aderuese me BE-në është një hap shumë i gabuar – thotë Todorov.

“Zyrtarisht nuk kemi dëgjuar nga Brukseli e as nga institucionet që janë të thirrur për këtë se data e negociatave varet nga rezultatet e punës së Komisionit. Çështja e dytë që dua ta them është se për çështjen e datës nuk duhet të kërkohen përgjigje tek anëtarët e komisionit, por tek faktorët relevant politik. Ne nuk jemi ata.” -deklaroi Petar Todorov, historian.

Në Ballkan të gjithë kemi një histori të përbashkët, por të mohohet ky fakt është problematike – thotë Todorov.

“Në fakt ajo që mbizotëron në shkencën bashkëkohore është se nuk ka histori që nuk është ndarë. Shumë me rëndësi është që këto koncepte historiografike të interpretohen në mënyrë të drejtë, e jo sipas nevojave politike. Ballkani është përplot me personalitete që u përkasin vendeve. Shembull rasti me Sami Frashërin – Shqipërinë dhe Turqinë. Ai është një personalitet i rëndësishëm edhe për Historinë e Turqisë dhe për historinë shqiptare. Nuk ka asgjë të keqe në këtë.” -shprehet Petar Todorov, historian.

Sipas Todorovit, shqetësuese është që edhe më tej në Ballkan shkruhen libra shkollor të historisë me tonalitete fitoreje, lidhur me të tjerët, madje siç thotë edhe militariste për krijimin e shteteve të mëdha.

“Kjo është problematike dhe duhet të tërhiqet nga librat shkollor nëse duam të ndërtojmë marrëdhënie të mira ndërfqinjësore, jo vetëm mes Maqedonisë dhe Bullgarisë. Nuk mund të thoni, në njërën anë se duam të shkojmë në Europë, kurse gjatë kësaj ta mbani rrëfimin e vjetër historik të ndasive dhe krijimin e antagonizmave” –vlerëson Petar Todorov, historian.

 Trashëgimia historike e Goce Dellcevit, tash poër tash mbetet mollë sherri në punën e Komisionit me ekspertët e Maqedonisë së Veriut dhe Bullgarisë. Por, siç thotë Todorov, ata do të vazhdojnë të kërkojnë pika të bashkimit dhe ndërlidhjes mes dy vendeve, siç është gjetur një bazë e përbashkët për Mbretin Samoil dhe iluministët Kirili dhe Metodi dhe Klimenti e Naumi. /Biljana Georgievska/

Aleanca për Shqiptarët ka mbajtur mbledhjen e radhës së kryesisë qendrore të partisë. Pas mbledhjes  për mediat është prononcuar Kryetari i ASH-së Ziadin Sela.

“Është urgjente që në kuadër të sistemit gjyqësor të bëhen ndryshimet e nevojshme që në krye të PSP-së të vijë kuadër nga vendet e BE, përmes ndryshimeve të ligjit. Kjo të bëhet edhe në istanca të tjera duke u kyçur ekspertë të jashtëm që do të merren me zbulimin e rasteve kriminale dhe korruptive, sidomos kur shqiptarët kanë humbur besimin tek sistemi i drejtësisë”, theksoi Sela pas mbledhjes së Kryesisë Qendrore të ASH-së.

Në një deklaratë për mediat Prokurorja e Prokurorisë Speciale Lençe Ristovska u paraqit së bashku me prokurorë tjerë pas zhvillimeve të fundit ku u përfshi edhe emri i Prokurores Speciale Katica Janeva. Ajo tha se të gjithë procedurat nuk janë vënë në pikëpyetje për arsye se veprimet  kanë qenë në përputhje me normativat ligjore.

 Në nëntor të vitit të kaluar, Prokuroria Speciale hapi rastin “Perandoria”, e atë kohë kërkoi paraburgim shumicën e të dyshuarve. E një muaj më vonë, Prokuroria Speciale ndërroi mendje dhe vendosi që ti lirojë të dyshuarit, madje më vonë edhe tua kthej edhe dokumentet, kurse për këtë opinioni kuptoi vetëm kur u pa njëri nga të dyshuarit kryesorë në një sallë sportive në Gjermani, duke përcjellë ndeshje të hendbollit. 

E në mars të këtij viti, sipas versionit zyrtar të PPS-së, një gyp e ngrohjes kishte plasur dhe kishte vërshuar bodrumin e institucionit, ku ruheshin edhe provat, e disa nga provat e dëmtuara ishin pikërisht ato për rastin “Perandoria”… Të gjitha këto ngjarje të çuditshme që ndodhën, e që kishin të bëjnë me rastin “Perandoria” nuk hapën asnjë dyshim tek prokurorja e rastit, Lile Stefanovska.

“Nuk frikësohem, nuk kam pse të jem pjesë e hetimit “- deklaroi Lile Stefanovska, Prokurore.

Ajo thotë se të gjitha përgjigjet për reketimin eventual ndaj biznesmenëve të njohur do të duhet t’i kërkojmë tek Katica Janeva.

“Në bazë të Ligjit për Prokurori Speciale, çdo dokument që del nga kjo Prokurori Publike, e nënshkruan vetëm Katica Janeva, dhe kur mungon nënshkruhen Prokurorët që autorizohen. Unë nuk kam nënshkruar asnjë vendim që ka dalë nga kjo Prokurori… As mendimet për lëshimin nga paraburgimi shtëpiak, as vendimin për kthimin e dokumenteve të Cvetan Pandeleski.” –tha Lile Stefanovska, Prokurore.

Në konferencën e sotme për media e thirrën disa prokuror, në krye me Lençe Ristovskën, por pa Katica Janevën, e cila nuk kishte ardhur në punë sot. Kërkuan nga opinioni që mos të dyshojnë në punën e tyre, dhe ta respektojnë prezumimin e pafajësisë.

“Sot nuk jam para jush vetëm në emrin tim, por edhe emrin e prokurorëve që janë këtu me mua, por edhe në emër të prokurorëve që janë në pushim vjetor, prokurorët Rrustemi, Donev dhe Fetai. 
Jam këtu para jush edhe në emër të gjithë ekipit hetues të Prokurorisë Speciale dhe në emrin e të gjitha shërbimeve profesionale të kësaj Prokurorie… Dua t’ju siguroj të gjithëve se interesi jonë primar është ruajtja e integritetit të këtij institucioni dhe dua tu siguroj se gjithmonë si ekip hetues, kemi vepruar në bazë të ligjit.” –përfundon Lençe Ristovska, Prokurore.

Ristovska tha se qëndrojnë pas punës së bërë, sepse thotë që kanë vepruar sipas ligjit në të gjitha procedurat hetimore, por për veprimet e Janevës, nuk deshi të përgjigjet, pasi janë në fazë para-hetimore. /Furkan Saliu/

Lëshimi i një strofe të himnit, ku numërohen personazhet historike dhe revolucionarët, nxiti reagime ndaj këngëtares Tamara Todevska, por edhe akuza të ndërsjella në mes politikanëve. Ambasada Amerikane, në manifestimin e së cilës në Ditën Kombëtare – 4 korriku, u këndua version i shkurtuar, sqaron se bëhet fjalë për “lëshim të paqëllimshëm në momet emocional”. Tamara kërkoi ndjesë, ndërsa pushteti dhe opozita po sulmojnë njëra-tjetrën në moment kur vendi realisht po negocion me Bullgarinë fqinje rreth asaj se trashëgimi historike e cilit shtet është revolucionari Goce Dellçev?

Mbrëmë para qindra të ftuarve në manifestimin e Ambasadës amerikane, për Ditën e Pavarësisë – 4 korrikun, këngëtarja Tamara Todevska nuk i këndoi katërrreshta të himnit zyrtar të Maqedonisë, edhe atë pikërisht ku përmenden revolucionarët Goce Dellçev, Pitu Guli, Dame Gruev, Jane Sandanski…

Por, version të këtillë të shkurtuar të himnit Tamara ka kënduar edhe më parë:

Nikoqiri i ngjarjes, Ambasada Amerikane menjëherë sqaroi se bëhet fjalë për gabim të paqëllimshëm.

“SHBA-të e respektojnë traditën, historinë, heronjtë dhe të ardhmen e mikut, partnerit dhe aleatit tonë – Maqedonisë së Veriut. E kuptojmë se në momente emocionale mund të ndodhin gabime të paqëllimshme. I falënderojmë këngëtarët për interpretimet e tyre të shkëlqyeshme mbrëmë.” -deklarojnë nga Ambasada e SHBA-ve.

Pasoi edhe kërkimfalja për lëshimin e bërë edhe nga këngëtarja Todevska, përmes rrjetit social Fejsbuk.

“Më lejoni që nga thellësia e zemrës sime t’u kërkoj falje për gabimin e djeshëm. Nuk ekziston nder më i madh për një artist se sa këndimi i himnit kombëtar dhe pikërisht për këtë arsye e pranova ftesën nga ambasada e SHBA-ve. Nuk ka fjalë me të cilat mund ta përshkruaj pikëllimin tim për lëshimin që e bëra gjatë këndimit të himnit.” -shprehet në rrjetin social fejsbuk këngëtarja Tamara Todevska.

Por, opozitarja VMRO-DPMNE në versionin e shkurtuar të himnit sheh “ kënaqësi për politikat e gabuara të qeverisë”.

“Si duket interpretimi i himnit nga Tamara Todevska ishte një mënyrë që të kënaqen politikat e gabuara të Zoran Zaev, të krijuara në periudhën e kaluar në llogari të interesave shtetërore dhe kombëtare, këtë herë në llogari të miqësisë maqedono – amerikane.”-deklaroi Naum Stoillkovski, VMRO DPMNE.

Gabim i paqëllimshëm – deklaroi kryeministri Zoran Zaev.

“Mund të bëhet një lëshim, himni i RMV-së këndohet çdo ditë, çdokund, dhe kjo vërteton se bëhet fjalë për gabim të paqëllimshëm”. thekson Kryeministri Zoran Zaev.

Shkalla e ndjeshmërisë rreth çështjes së revolucionarëve nga fillimi i shekullit të 20-të, të cilët edhe Maqedonia edhe Bullgaria i konsiderojnë si pjesë e historisë së tyre, është ngritur për shkak të pengesave në të cilat hasi komisioni i përzier për tejkalimin e dallimeve në librat e historisë, në pajtim me Marrëveshjen e nënshkruar për marrëdhënie të mira fqinjësore midis dy vendeve. Derisa për maqedonasit Goce Dellçev është pjesë e luftës dhe rilindjes maqedonase, bullgarët e konsiderojnë si bullgar dhe pjesë të historisë dhe kulturës së tyre. Nga Sofja zyrtare nuk përjashtohet që kjo çështje të pasqyrohet edhe në pritshmëritë e Maqedonisë për fillim të shpejtë të negociatave me Bashkimin Evropian, për çka të gjitha vendet anëtare të organizatës, mes të cilave edhe Bullgaria, duhet të japin dritë jeshile. /Verica Dimitrijevska/

Sot janë shpallur rezultatet e maturës shtetërore, në shkollat e mesme dhe në internet. Tash për tash nuk ka një ranglistë të shkollave më të suksesshme, por do të publikohet më vonë – thonë nga Inspektorati shtetëror i provimeve. Tradicionalisht pjesa më e madhe e 15 mijë maturantëve në Maqedoni, ardhmërinë e tyre e shihin në fakultete.

Traditë është që rezultatet nga matura shtetërore të publikohen në hyrjet e shkollave të mesme, ku çdo nxënës përveç emrit të tij do ta shoh edhe suksesin sipas lëndëve të caktuara. Por brezat e lindur në shekullin 21, në vend që t’i kërkojnë para dyerve të shkollave, tabelat së pari i kërkojnë në internet në ueb-faqen matura.gov.mk. Para Gjimnazit Josip Broz Tito në Shkup sot nuk kishte nxënës. Por edhe ata që ishin refuzuan të prononcohen.

Ministri i Arsimit Arbër Ademi dhe Drejtoresha e Qendrës Shtetërore të Provimeve – thonë se nxënësit këtë vit kanë treguar sukses më të mirë se vitet e kaluara.

“Rezultatet e maturës shtetërore tregojnë përmirësime në krahasim me vitin 2017 dhe 2018. Një rezultat i këtillë i detyrohet vizitës së koordinatorëve sipas lëndëve që kanë kaluar nëër shkollat e mesme para maturës, duke i njoftuar për mënyrën e përgatitjes së testit.’- shprehet Lidija Gjoshevska, Qendra shtetrore e provimeve.

Dallimet në mënyrën e marrjes së pikëve, në testin e biologjisë, në versionet maqedonisht dhe shqip, është gabim teknik, për të cilën në kohë kemi reaguar – siguron Gjoshevska.

“Është bërë një gabim teknik. Kur ndodhi unë menjëherë lëshova një shkresë deri tek të gjitha mediat dhe në ueb-faqen duke thënë se kjo nuk do të merret parasysh. Menjëherë është bërë korrigjimi teknik.” –tha Lidija Qendra shtetrore e provimeve.

Krahas optimizmit për rezultatet e provimeve, sukseset e nxënësve jashtë vendit në testet ndërkombëtare nuk janë gjithaq të kënaqshme. Testi ndërkombëtar PISA në vitin 2015 kishte ranguar nxënësit e shkollave të mesme të vendit në fund të listës. Në vitin 2018 madje 70% e nxënësve kanë treguar rezultate nën nivelin 1 në matematikë dhe lexim. Nivelet më të larta 5 dhe 6 në fushën e shkencës dhe leximit e kanë arritur vetëm 0.2% e nxënësve të shkollave të mesme. /Biljana Georgievska/

Kosova ua ka ndaluar zyrtarëve të Serbisë që të vizitojnë Kosovën. Ministria e Jashtme është arsyetuar se këtë veprim e ka ndërmarrë pas provokimeve e sjelljeve që po vijnë nga ky vend.

Ministria e Punëve të Jashtme e Kosovës ka marrë vendim që të mos lejojë vizitat e zyrtarëve të Serbisë në Kosovë. Vendim është marrë për shkak të kërcënimeve, inskenimeve në veri, e çështjeve tjera ka shkruar në Facebook këshilltari i ministit Pacolli, Jetlir Zymberaj.

Sipas tij janë të pafalshme përpjekjet e fundit të Beogradit për të inskenuar një të ashtuquajtur krizë humanitare në veri të Kosovës duke kërcënuar popullsinë serbe dhe duke i detyruar ata të mbyllin bizneset e tyre vetëm për shkak të disa objektivave politike të tyre.

Ky vendim i Kosovës vjen derisa ende është në fuqi taksa e vënë nga qeveria e Kosovës ndaj produkteve serbe edhe përkundër reagimeve të shumta për ta hequr atë.  Analisti Imer Mushkolaj e quan të ngutshëm, pasi që adresa e parë sipas tij do të duhej të ishte Brukseli.

Është vendim i gutshëm pasi është situatë shumë e brishtë. Kur të gjithë mendojnë se Kosova do duhet të tregojë vullnetin për bashkëpunim reciprok, pavarësisht që Serbia në shumë raste nuk është treguar e gatshme të bashkëpunoj. Ai thotë as ky veprim i institucioneve të Kosovës nuk do të ndikojë në ndryshim e qasjes së Beogradit karshi Kosovës.

Nuk beoj se do të rregulloj diçka në marrëdhënie, por do të bëjë edhe më të papërshtatshëm komunikimin mes të dyja vendeve. Menjehërë pas këtij vendimi të Kosovës ka reaguar edhe ministri i Punëve të Jashtme i Serbisë Ivica Daciq sipas të cilit ky vendim i Prishtinës zyrtare është një shuplakë për Beogradin dhe Bashkimin Evropian i cili po hesht në gjithë këto masa jocivilizuese të Kosovës ndaj Serbisë. /Blerta Dalloshi-Berisha, Prishtinë/

Lideri i VMRO-DPMNE-së Hristijan Mickoski në një prononcim për median maqedonase ka drejtuar akuza në adresë të Ministrisë së Brendshme se po ndiqet nga struktura të kësaj Ministrie. Ai madje potencon se skenari i ardhshëm mund të jetë arrestimi i tij. Këto pohime janë përgënjeshtruar nga MPB-ja.

VMRO-DPMNE është e gatshme të shkojë në zgjedhje në çdo kohë, por ata që i ikin përballjes janë pikërisht funksionarët në pushtet, të cilët kanë frikë se duhet të përgjigjen për krimin dhe korrupsionin, ndërsa duke ikur nga pasojat janë të gatshëm t’u kundërvihen të gjithë atyre që nuk mendojnë si ata. Kështu ka deklaruar, në një intervistë për median maqedonase, kreu i opozitës Hristijan Mickoski duke shtuar se, në periudhën e ardhshme pret një skenar të arrestimit të tij, pasi siç ka potencuar, po ndiqet nga struktura të MPB-së.

“Jam i vetëdijshëm se mund të vijë edhe deri te ajo. Kam biseduar me familjarë të mi, se nga Zoran Zaev dhe nga ata rreth tij mund të pritet gjithçka, mund të pritet edhe që të vijnë të më arrestojnë. Kjo le të jetë apel për ata persona që rrotullohen rreth meje, një njësi speciale e Ministrisë së Punëve të Brendshme, me arsyetimin se janë këtu që të mbikëqyrin oborrin e shkollës, që është në afërsi të shtëpisë sime. Unë jam i gatshëm dhe nuk ka asnjë dilemë se e di cili është qëllimi i kësaj qeverie despotike.” -tha Kryetari i VMRO DPMNE-së Hristijan Mickoski.

Këto supozime janë përgënjeshtruar nga MPB-ja duke shtuar se lideri i VMRO-DPMNE-së, me kërkesë të tij, nga viti i kaluar, ka sigurim nga ana e pjesëtarëve të Ministrisë së Brendshme. /Klan Macedonia/

Presidenti i Maqedonisë së Veriut Stevo Pendarovski ka nënshkraur vendimin për riemërimin e Armatës së Maqedonisë. Emri i ri do të jetë Armata e Maqedonisë së Veriut.

Armata e Maqedonisë së Veriut është emri i ri i ushtrisë së vendit. Presidenti Stevo Pendarovski ka njoftuar se dje ka nënshkruar vendimin për riemërim. Kjo do të thotë se në periudhën e ardhshme Armata duhet të furnizohet me uniforma që do të përmbajën emrin e ri. Ndryshe, rreth mosndryshimit të shkurtesës ARM, muajin e kaluar në një takim të përfaqësuesve të Armatës së Maqedonisë dhe NATO-s kishte reaguar Greqia.

“Dje nënshkrova dekretin për mbishkrimet në uniformat e armatës. Tash e tutje do të jetë Armata e Maqedonisë së Veriut. Do të thotë, ka përfunduar edhe kjo pjesë teknike dhe në periudhën e ardhshme furnizimet do të bëhen me mbishkrimet e reja.”- tha Presidenti i RMV-së Stevo Pendarovski.

Presidenti Stevo Pendarovski, gjatë vizitës në kufirin jugor dhe qendrës transitore për pranimin e migrantëve, ka deklaruar se pjesëtarët e armatës nuk do të tërhiqen nga kufiri jugor. Sipas tij, aktualisht nuk ka rrezik për valë migrantësh, kurse vlerësimet e BE-së kanë treguar se Armata është e gatshme të përballet me sfida të këtilla eventuale. /Klan Macedoni/

Kryeministrja serbe kritikon marrëveshjen Tiranë-Prishtinë

Pas nënshkrimit në Tiranë të Marrëveshjes ndërministrore mes Shqipërisë e Kosovës për bashkim të përfaqësive diplomatike e konsullore dhe për bashkëpunim strategjik në fushën e politikës së jashtme, ka reaguar kryeministrja e Serbisë, Ana Bërnabiq. Ajo e ka cilësuar si skandaloz edhe mosreagimin e Uashingtonit dhe të Brukselit.

Kryeministrja serbe, Ana Bërnabiq, trasmeton Klan Macedonia, e ka cilësuar si skandaloze marrëveshjen e sapofirmosur ndërministrore mes Shqipërisë dhe Kosovës. Ajo i tha televizionit PINK se është e habitur edhe nga heshtja e komunitetit ndërkombëtar ndaj paralajmërimit të Tiranës e Prishtinës zyrtare për veprim të përbashkët diplomatik dhe siç tha, politikën e jashtme të përbashkët:

‘Është e tmershme, është e tmershme. Është skandal që ende nuk kemi pare asnjë reagim zyrtar as të Shteteve të Bashkuara të Amerikës, as të Bashkimit Evropian. Kjo nuk është naive, kjo është tejet serioze,’– tha kryeministrja serbe duke varur shpresën tek shefi i ri i politikës së jashtme, kryediplomatit spanjoll, vendi i të cilit nuk e ka njohur Kosovën.

Ana Bërnabiq, pas takimit me Eliot Engel, kryetar i Komisionit për Marrëdhënie me Jashtë i Dhomës së Përfaqësuesve të Kongresit amerikan, tha se ka përshtypjen se nuk pritet për së shpejti që të vazhdojë dialogu mes Prishtinës e Beogradit. Megjithëse ritheksoi qëndrimin se dialogu duhet të zhvillohet nën kujdestarinë e Bashkimit Evropian, ajo la të hapur mundësinë që në lehtësimin e tij të përfshihet edhe administrata amerikane, por edhe, sikurse nënvizoi, vendet anëtare të përhershme të Këshillit të Sigurimit të Kombeve të Bashkuara. /Klan Macedonia/

Maqedonia e Veriut është e mirë se ardhur si vendi i 30-të i NATO-s dhe shpresoj se integrimi i plotë mund të ndodh në Samitin e Aleancës në Londër kur do të shënohet 70-vjetori i themelimit të NATO-s. Kështu ka deklaruar Zv/Sekretari i Përgjithshëm i NATO-s për sfida të Sigurisë Antonio Misiroli gjatë një takimi me Kryeministri Zoran Zaev. Zaev ka rikujtuar se deri më tani njëzet vende anëtare të NATO-s kanë ratifikuar protokollin aderues, kurse në disa vende procedura e ratifikimit është në vazhdë e sipër.

“Shpresoj se procesi do të kompletohet deri në dhjetor të vitit 2019 kur Aleanca do ta kremtojë 70 vjetorin e ekzistimit me 30 vende anëtare që do të jetë një mesazh i Aleancës për politikat e dyerve të hapura për vendet tjera që kanë aspirata të këtilla. Anëtarësimi në NATO është plotësimi i qëllimeve strategjike së bashku me integrimin në Bashkimin Evropian.” -tha Zoran Zaev – Kryeministër i Maqedonisë së Veriut.

Këto komente kreu i qeverisë së Maqedonisë së Veriut i bëri gjatë prezantimit të Digjitalizimit të sistemit për menaxhim me kriza në organizim të Qendrës për ballafaqim të krizave dhe NATO-s, që ka financuar instalimin e të ashtuquajturit Sistemin Komandues të brezit të ardhshëm ku nga viti i ardhshëm pritet koordinimi përmes platformës së vetme të internetit, që në mënyrë më efikase t’u përgjigjen sfidave siç janë tërmetet, zjarret, përmbytjet apo fatkeqësitë tjera natyrore. /Klan Macedonia/