Lukashenko: Bjellorusia është autoritare

Lideri bjellorus, Alyaksandr Lukashenko, e ka pranuar të enjten se ai udhëheq një shtet autoritar, mirëpo ka pretenduar se nuk ka të burgosur politikë në shtetin e tij të izoluar.

“Po, sistemi ynë i pushtetit është më i ashpër. Unë as nuk e përjashtoj termin ‘autoritar’”, ka thënë Lukashenko në një intervistë për agjencinë e lajmeve AFP.

Grupi bjellorus për të drejta të njeriut Viasna, ka thënë se në këtë shtet aktualisht janë 1,259 të burgosur politikë.

Mirëpo Lukashenko ka hedhur poshtë diskutimet për “qindra” të burgosur dhe ka pretenduar se askush nga opozita nuk është duke u mbajtur në burg.

Lukashenko, i cili ka udhëhequr Bjellorusinë prej vitit 1994 synon të portretizojë gjithë opozitën ndaj tij si komplot të mbështetur nga Perëndimi.

Ai ka kritikuar bjellorusët që kanë marrë pjesë në protestat kundër rizgjedhjes së tij në zgjedhjet presidenciale të vitit 2020.

“Ata njerëz kanë dalë kundër shtetit. Jo kundër autoriteteve, por kundër shtetit dhe kombit të tyre”, ka thënë ai.

Lideri 67-vjeçar ka shuar protestat me ndihmën e aleatit të tij, presidentit rus, Vladimir Putin.

Liderët kyçë të protestave janë të burgosur apo kanë ikur nga shteti.

“Nuk jam diktator”, ka thënë Lukashenko, ndonëse ka pranuar se Bjellorusia ka “elemente të autoritarizmit”.

“Nuk jam aq i egër sa mendoni ju”, ka shtuar ai.

Prej shuarjes së protestave, autoritetet bjelloruse kanë goditur secilin që ka shfaqur mospajtime ndaj shtetit. /REL

Lexo gjithashtu
Total
0
Share