close
BotaTop Lajme

ROTERDAM: TË LËNDUAR NË PROTESTAT KUNDËR VAKSINIMIT

NETHERLANDS-POLITICS-HEALTH-VIRUS-DEMO

POLICIA E DETYRUAR TË GJUAJË NË VETËMBROJTJE

Shtatë persona janë lënduar gjatë protestave të mbrëmshme në Holandë, pasi policia ka hapur zjarr drejt protestuesve kundër Covid restriksioneve në vend. Kryebashkiaku i Roterdamit mbrëmjen e quajti “orgji të dhunës”, për të cilën arsye policia ka qenë e detyruar të mbrohet. Holanda këtyre ditëve shënon  shifra rekorde të të infektuarve të rinj dhe është në fuqi karantinë e re e pjesshme.

Herët në mëngjes pas protestave të dhunshme në Roterdam, kryebashkiaku Ahmed Abutaleb para gazetarëve konfirmoi se “në më shumë drejtime policia ka qenë e detyruar të nxjerrë armët që të mbrohet” nga protestuesit në zonën tregtare qendrore, ku kanë ndezur zjarre, kanë hedhur gurë dhe mjete piroteknike drejt policëve.

AHMED ABUTALEB, KRYEBASHKIAK, ROTERDAM

“Kanë gjuajtur drejt protestuesve, ka të lënduar. Gjatë dhunës janë lënduar edhe disa policë. Janë arrestuar dhjetëra persona, pritet të arrestohen edhe të tjerë, pasi të analizohen video pamjet nga kamerat e sigurisë.”

Fotografitë e trazirave tregojnë një makinë policie të djegur dhe një tjetër me biçikletë të shtyrë përmes xhamit të përparmë. Turma u shpërnda vetëm pas mesnate, me topa uji dhe ndihmën e njësive policore që vinin nga qytetet përreth. Këto konsiderohen si protestat më të dhunshme që nga fillimi i pandemisë, në të cilat kanë marrë pjesë edhe huliganë të futbollit.

Një televizion lokal tregoi pamjet që tregonin si një person është qëlluar, por për momentin nuk janë dhënë detaje zyrtare.

Është hapur hetim i pavarur për gjuajtjen me armë drejt policëve, që është një praktikë e zakonshme në vend.

Protesta, në të cilën “qendra e qytetit të bukur u shndërrua në një zonë lufte” siç përshkruhet nga një politikan vendas, erdhi pasi qeveria njoftoi ligj të mundshëm që do t’i lejojë bizneset të kufizojnë sistemin e kalimit vetëm për njerëzit që janë plotësisht të vaksinuar ose e kanë kaluar Covid-19, por jo edhe për ata me test negativ./KlanMacedonia/

 

 

Klan Macedonia

The author Klan Macedonia