Trazira në Paris pas miratimit të reformës së pensioneve

Qeveria franceze i mbijetoi votave të mosbesimit, Marine Le Pen i kërkoi Këshillit Kushtetues të censurojë projektligjin

Protestuesit i vunë flakën grumbujve të mbeturinave në qendër të Parisit pasi qeveria e Presidentit Emmanuel Macron i mbijetoi ngushtë një mocion mosbesimi në parlament për reformën e pensioneve.

Në disa nga rrugët më prestigjioze të Parisit, zjarrfikësit u përpoqën të shuanin zjarrin në grumbujt e mbeturinave të grumbumbulluara për ditë të tëra për shkak të grevave. Policia sulmoi protestuesit dhe arrestoi disa prej tyre.

“Si të gjithë, edhe unë jam shumë i zhgënjyer dhe i zemëruar. Nuk mendoj se mocionet e mosbesimit që po hidhen në parlament i jep fund luftës kundër regresionit të jashtëzakonshëm social që përfaqëson ky projektligj. Mendoj se represioni i drejtuar nga policia drejt protestuesve që vjen me veprimet e këtyre ditëve të fundit e rrit edhe më shumë zemërimin.”

“Epoka e Borne ka mbaruar. Realiteti është se qeveria është e varur nga një fije”, u shprehën disa ligjvënës. Rezultati në Asamblenë Kombëtare ishte një lehtësim për Macron, pasi një votë e suksesshme mosbesimi do të kishte fundosur qeverinë e tij.

Rreth 278 deputetë votuan në favor të mocionit të mosbesimit nga 287 votat e nevojshme për të kaluar. Mocioni i dytë, i sjellë nga Tubimi Kombëtar i ekstremit të djathtë, mori vetëm 94 vota. Ligjvënësit nga e majta La France Insoumise mbajtën pankarta në dhomën e ulët në Asamblenë Kombëtare me sloganin “Dorëhiquni!” dhe i bënë thirrje kryeministres Elisabeth Borne të largohet.

Megjithatë kundërshtarët e këtij projektligji kanë deklaruar se do t’i kërkonin Këshillit Kushtetues të rishikojë tekstin përpara se të shpallet zyrtarisht, duke hapur derën për refuzimin e mundshëm të neneve brenda masës nëse ato nuk janë në përputhje me kushtetutën. Udhëheqësja e ekstremit të djathtë, Marine Le Pen , bëri të ditur se do t’i kërkonte këshillit ta censuronte atë.

Vëzhguesit thonë se dështimi i Macron për të gjetur mbështetje të mjaftueshme në parlament për të hedhur në votim propozimet e tij për pensionet tashmë ka minuar axhendën e tij reformiste dhe ka dobësuar udhëheqjen e tij. Trazirat e dhunshme kanë shpërthyer në të gjithë vendin ditët e fundit dhe sindikatat kanë premtuar të intensifikojnë aksionin e tyre të grevës, duke e lënë Macron të përballet me sfidën më të rrezikshme që nga kryengritja e “Jelek Verdhëve”.

Klan News

Lexo gjithashtu
Total
0
Share