Autoritetet në Maqedoninë e Veriut kanë njoftuar se në gjashtë mujorin e parë të këtij viti, 69 persona kanë vdekur në aksidentet e trafikut nëpër rrugët e vendit. Një ndër shkaqet kryesore të aksidenteve përmendet shpejtësia por edhe mosrespektimi i rregullave të trafikut si dhe vozitja nën ndikimin e alkoolit.
Këto janë pamjet e aksidentit tragjik që ndodhi më 13 Shkurt të këtij viti në autostradën Shkup – Tetovë… Disa të involvuar në këtë aksident tashmë janë të akuzuar se në mënyrë të drejtpërdrejtë kanë kontribuar për vdekjen e 16 personave kur autobusi i kompanisë ‘Durmo Turs” doli nga rruga dhe u rrokullis në humnerë. Mes tyre vozitësi dhe pronari i kompanisë. Gjatë ekspertizës është vërtetuar se shpejtësia dhe gjendja jo e rregullat teknike e autobusit kanë qenë shkaktarë të këtij aksidenti tragjik.
Autoritetet njoftojnë 69 persona kanë humbur jetën në periudhën kohore Janar – Qershor të këtij viti, në aksidentet e trafikut që kanë ndodhur në nivel vendi. Shpejtësia, mosrespektimi i rregullave të komunikacionit dhe vozitja nën ndikimin e alkoolit kanë qenë shkaqet kryesore që kanë sjellë fatkeqësitë me pasoja fatale.
Ministria e Punëve të Brendshme ka njoftuar se gjatë gjashtëmujorit të parë të këtij viti kanë ndodhur 1281 aksidente trafiku me pasoja më të rënda, 49 aksidente trafiku që kanë shkaktuar vdekje dhe 1232 aksidente me persona të lënduar. Numri i përgjithshëm i personave të përfshirë në këto aksidente është 2051, prej tyre 69 të vdekur dhe 1982 të lënduar.
Siç njoftojnë autoritetet është shkaktuar dëm material në vlerë prej mbi 31 milionë denarë. Gjithsejt 226 aksidente kanë ndodhur për shkak të shpejtësisë, 153 për shkak të mosrespektimit të shenjave të komunikacionit, 108 aksidente për shkak të vozitjes nën ndikimin e alkoolit e të ngjashme. Gjatë zbardhjes së rasteve është vërtetuar se 1254 aksidente kanë ndodhur për shkak të gabimeve të vozitësve kurse 27 të këmbësorëve. Siç njoftojnë autoritetet për siguri në trafik mesatarisht gjatë një viti në Maqedoninë e Veriut shënohen 150 viktima gjatë aksidenteve të trafikut.