close

“KATAR 2022″: DYFISHOHET 100% TAKSA PËR ALKOOLIN

Rritja është cilësuar si “taksa e mëkatit”


Autoritet e Katarit kanë vënë në zbatim një taksë prej qind për qind (100%) mbi alkoolin, duke e dyfishuar brenda natës çmimin e tij. Rritja është cilësuar si “taksa e mëkatit”, pasi synon produktet që ndalohen nga ligji islamik. Taksa është aplikuar nga Autoriteti Doganor i Katarit dhe shtrihet edhe mbi produkte si duhani, pijet energjike dhe mishi i derrit. Vetëm të huajve u lejohet konsumimi i pijeve alkoolike në Katar.

Alkooli mund të gjendet në disa hotele dhe restorante të caktuara si dhe në vetëm një dyqan në periferi të Dohës.

Lajmi se më 1 janar do të aplikohej taksa e re bëri që shumë banorë të Katarit të krijonin rezerva të mirëfillta alkooli. Të ardhurat nga taksa e shtuar do të investohen në shërbime publike si shkolla dhe spitale.

Katari është vendi mikpritës i Kupës Botërore 2022. Organizatorët thonë se alkooli do të jetë i disponueshëm në hapësira të posaçme gjatë këtij eventi. /Agjencitë/