close
Top LajmeVendi

MAQEDONIA NË NATO: MË 6 SHKURT NËNSHKRUHET PROTOKOLLI PËR ADERIM

Screenshot_4

Maqedonia më 6 shkurt zyrtarisht do të nënshkruajë Protokollin aderues për hyrje në NATO. Në një ceremoni Protokollin do ta nënshkruajë shefi i diplomacisë së Maqedonisë Nikola Dimitrov, kurse vendet anëtare do të përfaqësohen nga ambasadorët e tyre të NATO –së.

Sekretari i Përgjithshëm i NATO-s Jens Stoltenberg njoftoi se ceremonia e nënshkrimit të dokumentit për pranimin e anëtarësimit të Maqedonisë në Aleancë do të mbahet më 6 shkurt.

“Më 6 shkurt do të shkruajmë histori. Aleatët e NATO-s do të nënshkruajnë protokollin e pranimit me Maqedoninë e ardhshme Veriore së bashku me ministrin e Punëve të Jashtme Dimitrov, shkroi Stoltenberg në Twitter.

Pas ratifikimit të Marrëveshjes së Prespës në Maqedoni dhe pastaj në Greqi, pengesa e fundit për anëtarësimin e vendit në Aleancën e Atlantikut të Veriut u hoq, pothuajse njëmbëdhjetë vjet pas bllokadës greke në Samitin e Bukureshtit në prill të vitit 2008.

Ceremonia e nënshkrimit do të mbahet në selinë e NATO-s në Bruksel, në prani të ministrit të Jashtëm Nikola Dimitrov. Njëzet e nëntë ambasadorë të shteteve anëtare do të nënshkruajnë protokollin, pas së cilës Maqedonia do të jetë në gjendje të marrë pjesë në të gjitha “formatet kryesore” të Këshillit të Atlantikut të Veriut.

Siç shpjegoi në një intervistë për MIA ambasadori slloven në NATO, Jelko Kacin, Maqedonia nuk do të jetë në gjendje të marrë pjesë në takimet ku shkëmbehet informacioni më i ndjeshëm, derisa të bëhet anëtare e plotë dhe me këtë fiton njohuritë e nevojshme për të menaxhuar atë lloj informacioni të ndjeshëm. Pas nënshkrimit të protokollit të pranimit, çdo vend anëtar i NATO-s do të duhet të ratifikojë anëtarësimin e Maqedonisë, një procedurë që mund të zgjasë në maksimum dy vite, edhe pse pritet që ajo të mbyllet në fillim të vitit 2020, madje ndoshta edhe në fund të këtij viti. Vende si Kanadaja dhe Belgjika njohin procedura më të gjata dhe më komplekse të ratifikimit. Sipas burimeve diplomatike në Greqi, Athina pritet të ratifikojë anëtarësimin e Maqedonisë në fund të javës së ardhshme, më 8 shkurt.

Pasi të gjithë 29 vende anëtare të Aleancës të ratifikojnë protokollin e pranimit, flamuri maqedonas do të ngritet së bashku me ato të të gjitha vendeve të tjera anëtare përpara selisë qendrore të Aleancës në Bruksel, dhe misioni i përhershëm diplomatik i vendit duhet gjithashtu të zhvendoset në zyra të reja bashkë me të gjitha shtetet e tjera anëtare. /Klan Maqedoni/

 

Klan Macedonia

The author Klan Macedonia