Osmani pret në takim shefin e EULEX-it, diskutojnë për zhvillimet e fundit në vend

Presidentja e Kosovës, Vjosa Osmani priti sot në takim lamtumirës shefin e EULEX-it, Ambasadorin Lars-Gunnar Wigemark.

Siç njofton Presidenca, në takimin me ambasadorin Wigemark, Osmani diskutoi edhe për zhvillimet e fundit në vend dhe për bashkëpunimin e institucioneve të Republikës së Kosovës me EULEX-in për tejkalimin e këtyre sfidave, transmeton Klankosova.tv.

“Presidentja Osmani vlerësoi kontributin e EULEX-it në promovimin e sundimit të ligjit dhe theksoi përkushtimin e vazhdueshëm të institucioneve të Kosovës për të arritur qëllimet e sigurisë dhe sundimit të ligjit në secilën pjesë të territorit të Republikës së Kosovës”, thuhet në njoftimin e Presidencës.

Gjatë takimit, Osmani dekoroi shefin e EULEX-it me medaljen presidenciale për sundimin e ligjit.

Ajo theksoi rëndësinë e partneritetit mes institucioneve të Kosovës dhe organizatave partnere ndërkombëtare që operojnë në fushën e sigurisë dhe sundimit të ligjit.

“Presidentja Osmani falënderoi EULEX-in për bashkëpunimin e tyre me institucionet e Republikës së Kosovës në fuqizimin e sundimit të ligjit në kuadër të mandatit ekzistues për këshillim, mentorim dhe monitorim”.

Dekorimi me medaljen presidenciale për sundim të ligjit paraqet vlerësimin dhe mirënjohjen e thellë të Republikës së Kosovës ndaj Ambasadorit Wigemark dhe EULEX-it për përkrahjen dhe bashkëpunimin e tyre të palëkundur në ndërtimin e një shoqërie të drejtë dhe të sigurt në Kosovë.

Lexo gjithashtu
Total
0
Share