Shqipëria përballet me situatë të paprecedentë! Dy data zgjedhjesh, heshtje zgjedhore si edhe mosbindje civile. Rreziku i akteve të dhunës është i pranishëm, prandaj policia po angazhohet maksimalisht. 12 persona u arrestuan dhe 39 të tjere u shpallën në kërkim pas përplasjes që ndodhi mbrëmë në një Komision Zgjedhor në Peshkopi. Sipas policisë protestuesit sulmuan me molotov shkollën, ndersa demokratët thonë se policia ka ushtruar terror ndaj të shoqëruarve dhe familjarëve të tyre.
Një natë pas përplasjeve në KZAZ-në numër 19 në Dibër, janë rikthyer tensionet edhe mëngjesin e së shtunës. Një grup protestuesish janë përplasur verbalisht me Forcat e Lëvizshme Operacionale që kanë mbërritur në Peshkopi.
Dymbëdhjetë persona janë vënë në pranga dhe 39 të tjerë janë shpallur në kërkim, për sulmin ndaj KZAZ nr. 19 në qytetin e Peshkopisë. Sipas policisë, këta persona në bashkëpunim me njëri-tjetrin, janë grumbulluar mbrëmjen e së premtes pranë KZAZ nr. 19 që ndodhet në ambientet e palestrës së shkollës “Nazmi Rushiti” dhe kanë sulmuar me sende të forta, kapsolla e bomba molotov, sulm që është bërë edhe në drejtim të punonjësve të policisë.
Për të penguar hyrjen e protestuesve në ambientet e shkollës, atje ku qëndronin edhe materialet zgjedhore, policia u këndërpërgjigj duke hedhur gaz lotsjesllës. Ndërsa mëngjesin e së shtunës, një grup protestuesish janë përplasur verbalisht me Forcat e Lëvizshme Operacionale që kanë mbërritur në Peshkopi pas incidenteve të mbrëmshme në KZAZ-në numër 19.
Ndërsa mbrëmjen e së enjtes, mbështetës të opozitës sulmuan KZAZ-në numër 6 në Bashkinë e Vaut të Dejës duke djegur materialet zgjedhore. Policia vuri në pranga 15 persona, mes të cilëve edhe nënkryetari i Bashkisë së Vaut të Dejës, Admir Hasnegaj, si dhe vëllain e kryebashkiakut të Vaut të Dejës, Alfred Hila, dhe disa funksionarë të kësaj bashkie./TV KLAN/
