Asnjë surprizë në provat zyrtare të garës së Çmimit të Madh të Australisë në Formula 1, që do të zhvillohet nesër. Makina Red Bull vijon të jetë më e shpejta në pistë, ku kampioni i botës Max Verstappen siguroi “pole position”.
Holandezi dha kohën 1’16”732, duke ndarë vijën e parë të nisjes me George Russell (Mercedes). Në përgjithësi, kohët e pilotëve ishin shumë të përafërta mes tyre, duke lënë të shpresosh që gara e nesërme do të jetë spektakolare.
Makina Mercedes zuri vendet 2-3, teksa i treti u klasifikua Lewis Hamilton, që la pas spanjollin Fernando Alonso me Aston Martin (i katërti). Vijon të zhgënjejë Ferrari, në vendin e pestë me Carlos Sainz dhe atë të shtatë me Charles Leclerc.
Mes dy makinave “kokëkuqe” u rendit Lance Stroll (Aston Martin), ndërkohë që në dhjetë makinat e para edhe Albon, Gasly e Hulkenberg. Probleme për makinën tjetër Red Bull të Sergio Perez, që do ta nisë garën nga vendi i fundit (doli jashtë piste).
